Það eru ákveðnar aðstæður sem virðast alltaf reyna á matarvenjurnar: barnaafmæli, saumaklúbbar, vinnukaffitímar og veislur fullar af freistingum.
Ef þitt markmið er að minnka sykurneyslu eða finna betri jafnvægi, þá ertu ekki ein. En hvernig er hægt að halda sér í takt við eigin markmið en vera samt hluti af stemningunni?

Hér eru hagnýt ráð og hugleiðingar sem hjálpa þér að vera með en ekki missa tengingu við líkama þinn eða markmið:

1. Borðaðu yfir daginn, ekki "spara hitaeiningar" fyrir veisluna
   Það virkar ekki að mæta svöng og ætla að vera skynsöm. Þá fer líkaminn í leit að skjótum og einföldum kolvetnum, og það verður nánast ómögulegt að standast kökuborðið.
   Borðaðu sérstaklega vel yfir daginn:
   • Próteinríkan morgunmat (t.d. eggjahræru með grænmeti)
   • Fitugjafa (avókadó, hnetur, möndlur)
   • Mettandi hádegismat (t.d. fisk, grænmeti og hýðishrísgrjón)


2. Ákveddu fyrirfram (í stað þess að "detta í það")
   Áður en þú mætir:
   • Ætla ég að fá mér eitthvað sætt?
   • Ef já, hvað ætla ég að velja og njóta meðvitað?
   • Ef nei, hvernig ætla ég að bregðast við ef mér er boðið?
   Þú gætir valið að fá þér eina sneið af súkkulaðiköku og njóta þess eða sleppa því alveg og finna annan fókus í veislunni.


3. Hættu "allt eða ekkert" hugsuninni
   Ef þú færð þér eitthvað sætt, þá ertu ekki búin að klúðra neinu. Ekki hugsa: "Nú er allt farið í vaskinn, ég ætla bara að borða allt sem ég finn."
   Minntu þig á: Það er vaninn þinn í daglegu lífi sem skiptir máli, ekki hvað þú gerir í einni veislu.


4. Fókusaðu á hvað þú GETUR borðað
   Í stað þess að hugsa "ég má ekki fá mér þetta", einbeittu þér að því sem styður þig.
   Í flestum veislum, saumaklúbbum, afmælum er oft fleira í boði en sætmeti, eins og t.d.:
   • Hnetur
   • Ostar, skinkur
   • Grænmeti/Ávextir
   • Próteinríkur matur
   • Brauðréttir
   Smá skipulag hjálpar þér að finna valkosti sem líkaminn þinn bregst betur við.


5. Taktu með eigin valkost (ef á við)
   Það er ekkert skrítið að koma með snarl sem hentar þér og jafnvel bjóða öðrum líka! (Sérstaklega ef þú þekkir viðkomandi vel sem heldur boðið.)
   Það gæti verið t.d.:
   • Grænmeti og hummus
   • Hafrakökur án sykurs
   • Döðlur með hnetsmjöri


6. Hafðu fókusinn á fólki, ekki matnum
   Matur er hluti af samveru, en hann þarf ekki að stjórna boðinu.
   Hugsaðu: Hvað vil ég muna frá þessari stund? og með hverjum langar mig að eyða stund með?
   Ef þú nærð að færa athyglina yfir á tengingu, hlátur og gleði, þá dvínar dramatíkin í kringum snakk og kökur.